إعتقلني - قصيدة عاميه للشاعر محمد السري

لوعجزت انك تصادر نبل افكارى
اعتقلنى
لوعجزت انك تحاصر فيا اصرارى
اعتقلنى
لو لاقيت ان الشعاع اللى بيضوى...
جاى منى
لو في يوم بدد ضلامك....
يبقى لازم تعتقلنى
*******
اعتقلنى لانى أجرمت ف حقوق...
الهباشين
اللى قاعدين فوق صدورنا 
ونهبوا خيرنا من سنييييييييين
انجليز
أتراك
ملوك
رؤساء
عصابه مشكلين
جم وسرقوا بلدنا منا وخرسوا صوتنا الملعونين
*******
اعتقلنى لانى صوتى مش هابيعه
مش عشان قرشين هاسيب اهلى يضيعوا
لو مسكت عليك غلط عالكون هاذيعه
راح خريف الظلم والنور جاى ربيعه
*******
اعتقلنى بتهمة الحب لبلادى
بس هاصرخ من ورا القطبان وانادى
وارفع الرايه واسلمها لولادى
عمر جندى الحق مايبوس الايادى
*******
اعتقلنى ومش هاخاف يوم من كلبشك
اعتقلنى اصل انا اللى تملى هرشك
اعتقالى لوحده مش هيدارى غشك
اصل ماسك الزيف وقع وكشفنا وشك
*******
اعتقلنى واعتقالى مش مفيد
الكلبش ف ايدى الماظ....
مش حديد
حتى لو تقتلنى....
برضه هموت شهيد
وادخل الجنه واعيش اسعد سعيد
*******
اعتقلنى...
بس خدها نصيحه منى
لو عايز تخرسنى، ومتسمعش زنى
امحى كلمة (حق) من قلبى ودمى
يومها روحى تروح معاها...
غصب عنى .