نغمه جديده وبيرددها ناس مش حاسه بطعم الذل
ناس أخدت على دق الطبله وبوس الكف ورش الفل
أو ناس تانيه الظلم عزلها ومنعها على الدنيا تطل
شافوا قدامهم مخلوع كهنه مسكين قوى يصعب ع الكل
قالوا ده ف سن أبوكوا يا عالم.. إكرموا شيبته ف آخر العمر
لأ مش ابونا
لأمش ابونا اللى بيسرقنا ويسرق قوتنا وقوت أولادنا
علشان يتمتع وعياله بيدينا وبيبيع فى بلدنا
اللى ف عز احنا ما بنكافح علشان هدمه تدارى جسدنا
هو مفصل بدله خصوصى إسمه عليها عشان ينقطنا
يبقى تقولوا أبوكوا وهو مسيد نفسه.. ومعبدنا
لأ مش ابونا
لأمش ابونا اللى بيخدعنا بإسم المدعوقه الشفافيه
الانتخابات بيزورها وينجح حبة حراميه
وبيحبسنا لو نتكلم ويلبسنا ألف قضيه
ماهو عنده قانون طارئ خانق بيحاسب شعبه على النيه
يبقى ازاى بتقولوا أبوكوا وهو حارمنا من الحريه!!
لأ مش ابونا
لأمش ابونا اللى بيحرمنا من نيلنا وأرضنا وسمانا
وبيمنع خيرنا من اخوانا ويسلم عرضنا لعدانا
اللى مكرهنا ف أوطانا وبيقتل لانتما جوانا
واما فهمنا وقمنا وثورنا..
إشترى كرسى رخيص بدمانا
هو فى أب بيقتل إبنه!!..
يبقى بلاش نغمتكوا معانا
الأب..
الأب اللى بيحمى ولاده ويحاجى عليهم ويصونهم
قبل اللقمه ما تلمس جوفه؛؛ يطمن إنه مشبعهم
يتعب قوى لو شاف فى عنيهم كلمة آه بتقولها دموعهم
اللى مايسمحش لمخلوق إنه يتاجر يوم فى وجعهم
هو ده يبقى بجد أبونا، أما مبارك لأ سامحونا..
عمره ما حسسنا انه أبونا
المشاركات
ليست هناك تعليقات:
إرسال تعليق